Тикшеренүчеләр белдергәнчә, рак куркынычы гаилә хәленә бәйле булырга мөмкин. Тик еш кына исәпкә алынмый бу.
Майами университеты белгечләре йөз миллионлап кешенең мәгълүматларын тикшергән. Алар беркайчан да кияүгә чыкмаган хатын-кызларда яман шеш куркынычының гаиләле гүзәл затлар белән чагыштырганда 85 процентка (ир-атларда бу күрсәткеч – 70 процент чамасы) зуррак булуын ачыклаган. Бу хакта «Российская газета» Daily.Mail мәгълүматларына таянып яза.
Шулай ук өйләнмәгән ир-атларда үңәч рагы ихтималының башка көчле затларга (шул исәптән аерылышканнарга) караганда 2,5 тапкыр зуррак булуы билгеләнгән.
«Гаиләдә хисләреңне белдерергә, борчу-шатлыкларың белән уртаклашырга, финанс ярдәме алырга мөмкин булуына бәйле бу. Тик гаилә хәле еш кына юк-бар әйбер кебек кенә карала. Ләкин безнең тикшеренү бу фикернең дөрес түгеллеген күрсәтте», – дип билгеләп үткән Майами университеты профессоры Фрэнк Пенедо.
Кыскасы, галимнәр, ялгыз ир-ат һәм хатын-кызларга чир куркынычы (үпкә, эчәклекләр һәм үңәчтә яман шешне кертеп) гаиләлеләргә караганда күбрәк яный, дигән нәтиҗәгә килгән.
Сүз уңаеннан, хәзерге вакытта Татарстанда «Озын һәм актив гомер» илкүләм проекты гамәлгә ашырыла.
